2022 оны 09 дүгээр сарын 23, 24-ний өдрүүдэд Баянхонгор аймгийн Жаргалант сумд хангайн 4 сумын (Галуут, Жаргалант, Заг, Гурванбулаг) ЕБС-уудын багш, удирдах ажилтны мэргэжлийн туршлага солилцох үйл ажиллагаа амжилттай явагдаж өндөрлөлөө. Үйл ажиллагааны удирдамжид зааснаар бүсийн сургууль тус бүрийн багш нарын бэлтгэсэн үзүүлэх хичээлүүдийг заах, ажиглах, туршлага судлах, Жаргалант сумын ЕБС-ын үйл ажиллагаатай танилцах, мөн тус сургуулийн цахим сургалтын орчинтой танилцах, интерактив хичээл бэлтгэн явуулж буй арга туршлагаас судлах, Галуут сумын ЕБС-ийн даалгаврын сан бүрдүүлэлт, ЭЕШ-д бэлтгэж буй арга туршлагаас судлах, Заг сумын ЕБС-ийн тэгш хамран сургалт, хүүхэд хамгааллын бодлого, түүний хэрэгжилтийг зохион байгуулж буй арга туршлагаас судлах, Гурванбулаг сумын ЕБС-ийн хоцрогдлыг нөхөх, сурлагын чанарыг сайжруулахын тулд хийж буй ажил, арга туршлагыг судалж, сургуулийн захирлуудаас шинэ тутам хэрэгжиж буй Багшийн хөгжлийн төлөвлөгөөг боловсруулах, Мэргэжлийн хөгжлийн бүлэг байгуулах асуудлаар бэлтгэсэн танилцуулга мэдээллийг сонсож, бүсийн байгалийн ухааны багш нарын Мэргэжлийн хөгжлийн бүлгийг байгуулснаар туршлага судлах үйл ажиллагааны хүрээнд төлөвлөсөн ажлууд 100% хэрэгжлээ. Мөн энэ үеэр дэлхийн багш нарын 28, Монголын багш нарын 56 дахь өдрийг угтан сургуулиудын дунд урлаг, спортын уралдаан тэмцээнүүдийг зохион байгуулж, шилдгүүдээ тодрууллаа. Сүүлийн жилүүдэд тохиосон ковид цар тахал, бусад шалтгаануудын улмаас бүсийн багш нарын туршлага солилцох арга хэмжээ тасалдсан, багшлах боловсон хүчний хөдөлгөөн шинэчлэл ихээр хийгдсэн энэ үед уг арга хэмжээг Жаргалантын ЕБС-аас санаачлан, бүсийн сургуулиудын захиргаанаас дэмжин хамтран зохион байгуулсан нь багш нарын алжаалыг нэгэн өдөр тайлсан ажил байгаад зогссонгүй, мэргэжлийн багш нарын бие биетэйгээ ойртон танилцах, улмаар цаашдын мэргэжлийн хамтын ажиллагааны үүдийг нээсэн үр дүнтэй ажил боллоо хэмээн багш нарын зүгээс сайшааж байлаа. Энэ өдрүүдэд Жаргалантын сургуулийнхан өнгөлөг, соёлтойгоороо магтагдаж, Гурванбулагийн сургуулийнхан гярхай, авьяаслагаараа ялгарч, Загийн сургуулийнхан спортлог, эрч хүчтэйгээрээ цолгорч, Галуутын сургуулийнхан амжилттай, авхаалжтайгаараа түүчээлж, харилцан суралцаж, дутуугаа гүйцээж дундуураа дүүргэсэн, ядрахыг мэдрээгүй 2 өдөр байлаа. Арын албанд ажиллаж, зочдын сэтгэл хангалуун байх боломжийг бүрдүүлсэн Жаргалант ЕБС-ийн гар нийлсэн, бүтээлч, ажилсаг хамт олондоо баярлалаа.